Alla Itolae Nusa 16
Eleki meije Sarai, Abrame eni bina eni nanae sae mosa. Eni tamata makerike sae me tamata bina bei Mesire eni nane Hagare.
Hoko Sarai ibeteke loko Abrame be, “Arekwa be TUHANE Iono au ruele kwetele mo. Hoko mise lesi antulu kai auku tamata makerike leke tinake iruele kwetele ete au.” Eleki Abrame iono lulu Sarai ibeteke.
Kena mere Abrame irue musuna butu esa me Kanane peneka. Sarai, Abrame eni bina irana Hagare, eni tamata makerike bei Mesire mere eleki irilukeni ete Abrame leke Abrame ionoi kena eni bina piala.
Abrame intulu kai Hagare, hoko Hagare ikeu blublulu. Kena Hagare irekwa be ikeu blublulu peneka hoko kwakwaeni kai iholmate Sarai moneka.
Hoko Sarai ibeteke loko Abrame be, “Abalale le au supu susate le au riluke Hagare, auku tamata makerike etemu po kena irekwa be ikeu blublulu peneka hoko iholmate au moneka. Sebeie TUHANE Iteue be sire eni salare, au pibe ale.”
Eleki Abrame ibeteke loko Sarai be, “Amu tamata makerike mere akbasaeni hoko sebeie aono saisa etei neka rebe anoakele mise.” Eleki Sarai ino Hagare eni hidupe susa, eti Hagare inaya beini.
TUHANE Eni malekate iaselukeni ete Hagare tehaike kwele bolai sae me ndete otoi nsekile, me lalane lolete Sure.
Malekate ibeteke lokoi be, “Hagare, Sarai eni tamata makerike, abei etia kai akeu lo etiare?” Hagare iralake be, “Au naya bei Sarai, tamata rebe au kerike eteije.”
Eleki TUHANE Eni malekate ibeteke lokoi be, “Aleu loko tamata rebe akerike eteije, kai sebeie ikbasaemu.”
Kai TUHANE Eni malekate ibeteke lokoi lekwe be, “Tatike pine au ono amu anubuaru esi boka titinai eti sae neheke tekwasi moneka.
Akeu blublulu meije namake aruele kwete mokwai hoko ono eni nane Ismaele le TUHANE Ilene kena tamata rebe akerike eteije iono amu hidupe susare peneka.
Kwetele mere namake irue kena otoi esa mo lupe keledai lilaline. Namake ilisa kai tamata makete kai tamata makete esi lisa kaini kai ilisa kai kwalinisi me otoi rebe irue kenare.”
Eleki Hagare ikotie TUHANE Eni nane, “TUHANE meije El-Roi”. Le iombe, “Ete meije, au selu TUHANE rebe Ili loko aure peneka po au mata mo!”
Bei mere hoko tamata esi kotie prigi mere prigi Lahai-Roi, esi natire mei kwele rebe Alla rebe Eri kwanare Ili loko aure. Prigi mere eme Kadese kai Berete esi tlelare.
Eleki Hagare iruele kwete mokwai ete Abrame eleki Abrame iono kwetele rebe Hagare iruelei mere eni nane Ismaele.
Kena Hagare iruele Ismaele ete Abrame, Abrame eni musuna butu kwalu lesini ne.